Албатта, ҳеч қандай билим ва кўникмасиз, осонлик билан катта пул топиш ҳаммани ҳам қизиқтиради. Лекин шуни тушуниш керакки, тармоқда бундай мўъжиза йўқ. Агар сизга ўша мқъжизани ваъда қилишаётган бўлса, билинг-ки, бу соҳадаги тажрибасизлигингиздан фойдаланиб, тез орада сизни алдашади. Бундай ҳолда ҳеч қандай пул топа олмайсиз, балки сиздан фойдаланиб, ўша ваъдабозлар пул ишлашади!

Кейинги пайтларда “Интернет-бизнес”, “Интернетда пул ишлаш” каби тушунчалар жуда ҳам оммавийлашиб бормоқда. Ҳозирги кунда ҳар бир интернет фойдаланувчиси электрон пуллар (Webmoney, e-Gold, Yandex.Dengi) ва ундан тармоқда қандай фойдаланиш мумкинлиги ҳақида маълум тасаввурга эга. Фойдаланувчиларнинг каттагина қисми эса тармоқда пул ишлаш йўлларини аллақачон ўзлаштириб олишган. Сиз ҳам тармоқда пул ишлашга қизиқяпсизми? Қарорингиз ёмон эмас! Бунинг учун сиз аввало нима қиласиз? Албатта, Google, Yandex каби қидирув тизимларида “Интернетда пул ишлаш”, “Интернет бизнес” каби сўзларни киритиб, керакли сайтларни қидириб кўрасиз ва бирма-бир уларни ўргана бошлайсиз... Бир зумда сизни миллионерга айлантириб юборишга ваъда берувчи хилма-хил таклифлар билан кўмиб ташлашади. Бир қарашда уларнинг ҳаммаси ажойиб ва тушунарли: ҳеч қандай ортиқча билим ва кўникмаларсиз, осонлик билан каттагина пул ишлаш мумкин! Сайтда кўрсатилган вазифаларни бажаришга киришасиз... Лекин негадир сиз кутган натижа чиқмайди. “Майли, бошқа тузукроқ йўли бордир”, дея яна ишга киришасиз... Яна вақтингиз (балки анчагина пулингизни ҳам) йўқотасиз... Ниҳоят фаҳмлайсизки, тармоқда ҳеч қандай билимсиз осонгина пул топиб бўлмайди. Ойига 1-10$ эмас, ростакамига тузукроқ пул ишлаш учун нимадир қилишни билиш керак... Эътиборингизга тармоқда энг кўп тарқалган электрон товламачилик кўринишларидан баъзиларини келтириб ўтамиз. On-line сўровномаларда “осон” пул ишлаш. Ёхуд ҳақ тўланувчи сўровномалар билан боғлиқ товламачилик. Интернетда “Тўлдирилган анкеталар учун 10-75 $ гача ҳақ тўловчи 500 та ҳомий рўйхатини сотиб олинг” мазмунидаги таклифларни кўплаб учратиш мумкин: “Юқори ҳақ тўланувчи иш – анкета саволларига жавоб йўллаш”, “Саволларга жавоб бериб, 2000$ га эга бўлинг” ва ҳоказо. Ёки мана бу кўринишдаги реклама матни ҳам кўп учрайди: “Сўровномаларни тўлдирганлик учун ҳақ олиш: ҳар бир сўровнома учун 2$ дан 75$ гача. Сўров ўтказиладиган гуруҳларда қатнашганлик учун ҳақ олиш: соатига 20$ дан 150$ гача. Маҳсулотларни синовдан ўтказганлик учун ҳақ олиш: ҳар бир маҳсулот учун 10$ дан 50$ гача. Тугалланмаган филмларни олдиндан кўриб чиққанлик учун ҳақ олиш: соатига 5$ дан 25$ гача”. Бу сўзлар шунчалик жозибадор жаранглайди-ки, амалда синаб кўрмаган киши унинг шунчаки кўзбўямачилик эканлиги ҳақида ўйлаб ҳам кўрмайди. Энди аниқ бир мисолга эътиборни қаратсак. Владимир Бывалов (Moneymaster.ru сайтининг муаллифи) www.uxxicom.com сайтидан 49.95$ га тўлдирилган сўровномалар учун ҳақ тўловчи ҳомийлар рўйхати жамланган пакетни сотиб олади. У барча кўрсатмаларга риоя қилган ҳолда 15та компания сайтида рўйхатдан ўтади. Лекин у ўйлагандек бўлиб чиқмайди. Сўровномалар жуда ҳам кам ўтказилади. Боз устига, ҳар 10 анкетадан 9таси қайсидир сабабга кўра сўровнома ўтказиш учун мос келмайди: ё ёши, ё жинси ёки бошқа сабабга кўра. У гўё америкаликлар сояси тагида йўқолиб кетади... Хуллас, бир йил ичида у атиги 50 балл тўплайди. Ваҳоланки, энг кам тўлов учун камида 1000 балл тўплаш керак бўлади! On-line пул айирбошлаш билан боғлиқ товламачилик. Сўнгги пайтларда тармоқда қуйидаги мазмундаги эълонлар кўпайиб кетди: “Кунига 500$ ишлашни хоҳлайсизми?”, “e-Gold – WMZ: соатига 100$!!!” ва ҳоказо. Қайси форумни ёки сайтни қараманг, кимдир электрон пул айирбошлаш орқали жуда ҳам катта даромад топаётганини ҳикоя қилаётган рекламаларга кўзингиз тушади. Қуйида бир сайтдан (уларни кўпчилиги бир саҳифали сайтлар) олинган матнга эътиборингизни қаратамиз: “Энди ҳаммада катта пул ишлаш имконияти бор!!! Яқинда интернетда пул ишлашнинг янги усулига дуч келдим: кунига 1000$ ваъда қилишди. Уни амалда синаб кўрдим: ҳаммаси жойида!!! Мана ўша усул: Рус оn-line айирбошлаш шахобчаси http://www.roboxchange.com орқали 20 WMZ = 20 e-Gold курси бўйича ўз WMZ (Webmoney Transfer тизимидаги АҚШ долларининг электрон титул бирлиги) пулингизни e-Gold (АҚШ долларида электрон ҳисоб-китобларни олиб борувчи инглиз тилидаги электрон тўлов тизими)даги ҳисобингизга айирбошлайсиз. Шундан сўнг, чет эл (инглиз) электрон айирбошлаш шахобчаси http://pots-exchanger.com орқали 20 e-Gold = 22.4 WMZ курси бўйича пулларингизни WMZ ҳисобингизга қайта айирбошлайсиз. Ҳар бир айирбошлашдан тушадиган соф фойда миқдори роппа-роса 2$ ни ташкил этмоқда! Ушбу жараённи 30 марта такрорлайсиз (тахминан 40 дақиқа) – соф фойда 60$. Диққат: чет эл айирбошлаш шахобчасида энг кам пул айирбошлаш миқдори – 20$. Мен ўзим кун бўйи худди шу усулда пул айирбошлайман ва кунига 500$дан даромад топаман”. Таажжуб... У нима учун бу ҳақда ҳамма ёққа жар солиб юрибди? Кунига 500$ топаётган экансан, ўз ишингда давом этавер! Ҳаммага сирни ошкор қилиб нима қиласан?! Хўп, бу ҳозирча шундай тура қолсин. Энди гапнинг бу ёғига қулоқ тутинг. Бу сизга шубҳали туюлмаяптими? Рус оn-line айирбошлаш шахобчаси http://www.roboxchange.comда WMZ ва e-Gold титул бирликларини 1:1 курс бўйича айирбошлашади. Бу ҳақиқатда мавжуд ва ишончли айирбошлаш шахобчаси. Лекин бу ердаги пул айирбошлаш жараёнидан мижозга ҳеч қандай фойда йўқ! Ҳамма гап бошқа ёқда... “Чет эл” электрон пул айирбошлаш шахобчаси – http://pots-exchanger.com! Сиз у ёққа айирбошлаш учун пул (20 e-Gold) юбориб, эвазига ҳеч нарса ола олмайсиз. Яъни, сизнинг WMZ ҳисобингизга келиб тушиши керак бўлган 22$ фирибгарнинг чўнтагидан жой эгаллайди... Ҳозирги кунгача бу фирибгар кўпчиликни анчагина пулга туширгани аниқ. Бундай сайтлар ўз манзили ва қиёфасини тез-тез ўзгартириб туради. Агар у ҳозир ҳам мавжуд бўлганда эди, унда ҳеч қандай ишонч белгиси (Webmoney Transfer тизимининг сертификати ва бошқа расмий сертификатлар) йўқлиги ёки бўлса ҳам, шунчаки, кўзбўямачилик учун қўйилганига гувоҳ бўлган бўлар эдингиз... (Текшириш учун яна бир шундай фирибгарлик сайти – http://online-change.comга кириб кўришингиз мумкин.) Масофавий иш – матн териш билан боғлиқ фирибгарлик. Эҳтимол сизнинг электрон почтангизга ҳам “Масофавий иш: матн териш. Ойига 20 000 рубль” мазмунидаги хатлар келиб тушган бўлса керак? Одатдагидек, қайсидир бепул эълонлар доскасида ёки спам тарқатиш йўли билан “қулоғингизга лағмон илиш”ни бошлашади: “Нашриёт полиграфия компанияси компютер оператори лавозимига узоқлашган ходимлар учун иш ўринларини таклиф қилади.” Иш қуйидаги йўсинда амалга оширилади. Сизга эски манбалардан олинган ва сканердан ўтказилган материаллар юборилади. Сизнинг вазифангиз – уларни Word редакторига ўтказиш. Матнда, шунингдек, ҳар хил график ахборотлар ҳам учрашиши мумкин... ва ҳоказо. Ҳар бир терилган саҳифа учун сизга яхшигина ҳақ тўлашни ваъда қилишади. Бир қарашда, бу иш ростдан ҳам ҳақиқийга ўхшаб кўринади. Сизни қизиқтириб қўйгандан сўнг эса... ҳар доимгидек, рўйхатдан ўтиш учун аъзолик бадали (50-100 рубль) тўлашни таклиф қилишади. Гўёки, бу пул сизни ишга жиддий киришганлигингиздан далолат беради... Ишнинг бу ёғини англаган бўлсангиз керак? Фирибгар сиздан пулни олади-ю, сизни бутунлай унутади! Сиз 50-100 рубл учун уни милицияга топшириб, ишни судга оширасизми? Йўқ, албатта. Шунинг учун ҳам бундай фирибгарлар ўз ишини ҳеч қўрқмасдан амалга ошираверишади. Демоқчи бўлганимиз, тармоқдаги ҳар қандай таклифга жуда ҳам ишонувчан бўлмасдан, бир оз мулоҳаза билан иш тутинг. Етарлича билим ва кўникмага эга бўлмай туриб, интернетда пул топиш ёки бизнес соҳасида кўзланган натижага эришиб бўлмайди. Шарофиддин Раҳимов, журналист